புதிதாக ஒன்று இருப்பதாலேயே சில நேரங்களில் பிடித்துவிடும். அப்படியாகவே எல்லா நாட்களும் புதிதாகவே தொடர வேண்டும் என்று மனம் விரும்புகிறது.
வீணான என் நேரத் துளிகளை பயன்படும் இடத்தில் செல்லதக்கதாக்கும் முயற்சி தான் இப்போது செயல்பட வைத்துக் கொண்டிருப்பது.
மாற்றங்களே நம்மை இயக்குகிறது. கோபப்படும் போது குறையும் மூச்சு மழலையைக் கொஞ்சும் போது சீரடைகிறது.
தூசுக்களைக் களைவதில் கழிந்தது இன்றைய நாள். தமிழராய் இருந்தாலே சுண்டலும், பொறியும் கூடுதல் உணவு இன்று.
விசேஷங்களும் வழக்கமான அலுவல்களிலிருந்து சற்று விடுதலை தரும். அலுவல்கள் நூறு வருடம் முன்பும் இன்றும் வேறு வேறு. ஆனால் ஓய்வுக்கான விசேஷங்கள் மனிதர்களுக்கும் இயந்திரங்களுக்கும் என்றும் ஒன்றே.
முழு உலகத்திற்கான சாளரம் சிறிதே. பறக்கும் வரை பற்றியிருக்கும் சாளரத்தின் கம்பிகள் நம்பிக்கையளிப்பவை. ஒரு வகையில் உந்திவிடுபவை. சாளரம் வழி நீ காண்பதே இவ்வளவு வெளிச்சமெனில் பறக்க தொடங்கினால் என்று நம்பிக்கையளிப்பவை. ஆனால் காற்றின் போக்கு, கால மாற்றம், அலைகழிப்பு நடைமுறை சிக்கல்கள். எதிர் நீச்சல் பட்சிகளின் சிறகுகளில்.
மதுவில் திளைத்த அப்பா சாய, பேருந்தில் உடன் வரும் மகன் தரும் தோள், எதிர்காலத்திற்கான நம்பிக்கை கோல். நான் அதனை இறுக்கி பற்றியிருக்கிறேன்.
( 18/10/2018 07:29 பி.ப . )
கருத்துகள்
கருத்துரையிடுக